Vegleiðandi reglur um próvtalsgeving í røkjuskapi í sambandi við nýtslu av teldu til skrivligu fráfaringarroyndirnar í framseting

Tá ið næmingur hevur nýtt teldu í sambandi við skrivligu royndirnar í framseting, skal próvtalið í røkjuskapi í høvuðsheitum verða givið við støði í, hvussu væl avrikið er sett upp, og hvussu lættlisin og týðiligur skrivaði teksturin er.

Roknað verður við, at próvtakari nýtir teldu við standard uppseting við-víkjandi síðubreidd, slag og –stødd av skrivt, frástøðu millum reglur og vídd av bredda (margen).

Fyri meðalavrikið er galdandi:

At próvtakarar heva nýtt standard uppseting viðvíkjandi síðubreidd, slag og –stødd av skrivt, frástøðu millum reglur og vídd av bredda (margen). At breddin høgrumegin er javnur, at yvirskrivtir og møguligar millum-yvirskrivtir eru passaligar til støddar, at tekstbrot og reglubrot eru nýtt á hóskandi støðum gjøgnum allan tekstin, og at røttu millumrúmini eru aftan fyri punktum, komma, semikolon og onnur tekn. 

Fyri avrik undir meðal er galdandi:

Fleiri av eyðkennunum fyri meðalavrikið vanta. Avrikinum vantar heild í uppseting.

Fyri avrik yvir meðal er galdandi:

Umframt eyðkennini fyri meðalavrikið skal próvtakarin hava lagt nakað av sínum egna aftrat. Avrikið skal bera brá av, at próvtakarin hevur gjørt sær sínar egnu metingar viðvíkjandi uppseting og útsjónd, og at innihald og uppseting eru ein eind.

Reglur um nýtslu av teldu til skrivligu próvtøkur fólkaskúlans

Við heimild í § 45 í kunngerð nr. 22  frá 14. mai 2008 um próvtøkur fólkaskúlans verða hesar reglur settar upp fyri nýtslu av teldu í sambandi við skrivligu próvtøkur fólkaskúlans:

§ 1. Til skrivligu próvtøkurnar eigur tað at vera loyvt at nýta teldu, har tað ber til.   Avgerðin um at nýta teldu verður tikin í samráði við næmingar og foreldur.

§ 2. Próvtakararnir skulu vera vanir at nýta telduna í dagligu undirvísingini.

§ 3. Próvtakararnir skulu hava møguleika fyri at velja, antin teir vilja nýta teldu til innskriving av endaliga  royndaravrikinum, ella teir vilja skriva inn við haldgóðari handskrift. Lærarin skal geva hvørjum einstøkum næmingi vegleiðing, áðrenn henda avgerðin verður tikin.

       § 4. Próvtakararnir skulu nýta teldur skúlans. Áðrenn royndina skulu teldurnar, ið verða nýttar, verða settar upp soleiðis, at tað ikki ber til hjá próvtakarunum at lesa tekstin á skíggjanum hjá hvørjum øðrum. Gott pláss skal eisini vera ímillum hvønn einstakan próvtakara.

       Stk. 2. Skúlin eigur at loyva næmingum at koma við egnum teldum til próvtøkuna og skal skipa soleiðis fyri, at el er til allar teldur, sum verða nýttar í sambandi við próvtøkuna.

§ 5. Loyvt verður at nýta eina vanliga tekstviðgerð við rættstavara. Próvtakararnir skulu ikki hava atgongd til internetið og hava ikki loyvi til at nýta myndir ella tekstir frá øðrum forritum, mappum ella fílum á teldu teirra undir royndini.

Viðvíkjandi orðabókum og hjálparamboðum annars verður víst til kunngerðina um próvtøkur fólkaskúlans.

Stk 2. Próvtakari, sum brýtur omanfyri nevndu reglur, skal verða vístur burtur frá royndini beinanvegin.

§ 6. Í minsta lagi eitt av umsjónarfólkunum skal vera teldukønt, eisini um tað bert er einans næmingur, ið tekur av tilboðnum um at nýta teldu til royndina.

§ 7. Meðan royndin er, skulu próvtakararnir hava møguleika fyri at fáa útskrivt av riti sínum. Eitt av umsjónarfólkunum skal hava ábyrgdina av at skipa fyri hesum. Skúlin ansar eftir, at eingin próvtakari verður órógvaður av hesum.

§ 8. Til royndirnar fáa næmingarnir handaða dátugoymslu (geyma) við skabelón til tekstirnar. Tá ásetta royndartíðin er farin, skal avrikið verða lagt á geyman. Vaktirnar í royndarhølinum prenta síðan royndaravrikið út á pappír.

Próvtakarar, sum nýta teldu til royndina, fáa somu tíð, sum teir, ið ikki nýta teldu

§ 9. Allar síðurnar í prentaða próvtøkuavritinum skulu hava hesar ásetingar, antin ovast ella niðast á hvørjari síðu:

• Navn og nummar (ella forbókstavir) á próvtakara.

• Navn á skúlanum

• Royndarslag

• Navn á flokki

• Navn á umsjónarfólki

Stk 2. Tá ið próvtøkuavrikið verður latið inn, skal próvtakarin seta sína undirskrift á hvørt einstakt ark. Eitt av umsjónarfólkunum skrivar sítt navn á fyrstu síðu.

§ 10. Skúlaleiðarin skal tryggja sær, at dátugoymslurnar eru tómar, áðrenn teir verða flýggjaðar næmingunum, tá ið próvtøkan byrjar. Dátugoymslurnar mugu ikki verða fluttar úr royndarhølinum, meðan royndin fer fram, og skulu latast umsjónarfólkunum saman við avrikinum. Dátugoymslurnar skulu goymast saman við avrikinum smbrt. kunngerð um próvtøkur fólkaskúlans § 12, stk. 4. Dátugoymslurnar kunnu ikki nýtast sum kladda ella sum skjalprógv fyri tí, sum skuldi verið latið inn.

§ 11. Verður streymslit ella verða aðrir trupulleikar við teldunum, sum ikki kunnu rættast, so verður hildið fram uttan teldur. Hetta skal kunngerast næmingunum, áðrenn teir velja smb. § 3.

§ 12. Um trupulleikarnir eru so stórir, at próvtøkan ikki kann halda fram, setir skúlin seg í samband við Mentamálaráðið/ Fólkaskúladeildina beinanvegin.

§ 13. Til próvtalsgevingina í røkjuskapi verður gjørd serstøk vegleiðing.