SAFT

 

Trygd og netskikkur

Í verkætlanini SAFT verður arbeitt við internetnýtslu hjá børnum og ungum.
Verkætlanin byrjaði 1.septembur 2002 og varar til 1. apríl 2004.
Luttakandi londini eru Danmark, Írland, Ísland, Noreg og Svøríki. Verkætlanin er fíggjað úr ES og frá luttakandi londunum.

Ætlanin við verkætlanini er at læra børn og ung at vísa ábyrgd, tá ið tey eru á internetinum.
Verkætlanin hevur eisini sum mál at styrkja foreldur, lærarar og onnur, so hesi gerast betur før fyri at læra børn at nýta internetið á tryggan hátt.
Við støði í teimum úrslitum, sum granskingini í verkætlanini gevur, verður gjørt kunningarátak, sum vendir sær til børn, ung, foreldur og lærarar. Kunnað verður m.a. á internetportalin http://www.saftonline.org/
Hvørt luttakaraland hevur sína heimasíðu til verkætlanina. Innihaldið er ikki tað sama.

Sum úrslit av verkætlanini er framleitt undirvísingartilfar um internet og internetnýtslu. Tilfar finst á donskum, norskum og enskum máli.

Future Kids Online

Í sambandi við verkætlanina var boðið til stevnu við heitinum, Future Kids Online, How to provide Safty Awareness, Facts and Tools. Stevnan var í døgunum 20. og 21 oktobur 2003.
Stevnun viðgjørdi, hvussu farast kann fram fyri at hjálpa børnum og ungum at handfara møguleikarnar, sum eru á interneti.
Í stevnuni var dentur lagdur á, at internetið er veruleiki og gerandisdagur hjá børnum og ungum, og at tað tí er neyðugt, at hesin veruleiki verður tikin við í uppalingina hjá børnum og ungum.

Samandráttur av stevnuni

Grundasjónarmiðið í stevnuni var, at internet og aðrir heimsumfatandi miðlar eru partur av gerandisdegnum hjá børnum og ungum.
Á stevnuni vóru fyrilestrar og pallborðsorðaskifti. Luttakararnir komu úr ymsum londum og lýstu evnið, frá ymsum vinklum.
Reyði tráðurin í flest øllum fyrilestrunum var: Internetið er partur av gerandisdegnum hjá børnum og ungum, lær tey at nýta tað við skili Undirvís bæði børnunum og umhvørvinum uttan um tey.

Tað finnast filtur at stýra, hvar børn kundu fara, og hvat tey kundu síggja. Niðurstøðan um tey var, at filtrini kundu bara vera ein hjálp. Tey taka bara ein part av tí, sum tey eru ætlað til og ofta rættuliga fitt av tí, sum tey ikki eru ætlaði til. Hildið var fyri, at børn eru so skilagóð, at tey í nógvum førum eftir lítlari løtu dugdu at koma sær uttan um filtrini. Filtrini eru ikki nakað, sum til ber at líta á, men tey kunnu tó vera ein hjálp.

Fleiri av fyrilesarunum vístu á, at nú internetið er gerandisdagur hjá børnum og ungum, so er neyðugt, at bæði foreldur og skúli geva sær far um tað og hava tað við í uppalingina hjá børnunum. Sum onkur tók til, so filtrini koma at sita millum oyrini og ikki í maskinunum. Børn eiga at læra, hvussu tey bera seg at á interneti, at tað eru menniskju, sum eru avsendarar og móttakarar, tá samskift verður. Eisini var víst á, at tað mest vandamikla er, um ábyrgdin fyri, hvussu ein ber seg at, verður flutt frá menniskja til maskinu.
Mint var á, at hóast børnini kanska vita meira um tøkni og at reika á interneti, so er tað tey vaksnu, sum hava flest royndir í, hvussu ein eigur at bera seg at, og hvørjar reglur eru galdandi í góðum og ringum løtum