Tíðindi

Týsdagurin og mikudagurin eru skipaðir á sama hátt. Byrjað verður við morgunsangi kl. 8, síðan fara næmingarnir í høllina til eina felagsløtu. Restina av degnum verður arbeitt í verkstøðum. Verkstøðini eru skipað tvørturum flokkar, soleiðis at næmingar úr 1. - 3. flokk arbeiða saman, og næmingar úr 4. - 7. flokk arbeiða saman. Næmingarnir í framhaldsdeildini arbeiða saman við næmingum úr sínum flokki.

Sí skrá og verkstøð her

Hósdagurin verður skipaður eitt sindur øðrvísi. Tá møta næmingarnir í kirkjuni til felagssang og andakt. Síðan verður farið í skúlan, har næmingarnir hugna sær saman við sínum flokki og gera floksreglar. Dagurin endar við einum braki í høllini, har gyklarin Ásbjørn Berthelsen vitjar.

Føstulávintshaldið

Fríggjadagin 12. februar verður føstulávintshald í skúlanum. Næmingarnir møta kl. 8, og sum vanligt verður byrjað við morgunsangi, síðan fara allir næmingarnir í sína stovu.

Tunnuslátturin byrjar kl. 9, og kl. 10.30 verður farið upp á gólv í Miðstovuni. Foreldur og onnur áhugað eru vælkomin framvið at luttaka í føroyska dansinum og fáa sær ein kaffimunn.

Tá ið liðugt er at kvøða, fáa næmingarnir føstulávintsbollar og kakao. Skúladagurin er liðugur kl. 12.

Foreldrini vælkomin til morgunsang

Mánadagin 1. des. prýddu næmingarnir skúlan við alskyns jólaprýði.

Aftur í ár hava vit eitt felags jólatræ, sum næmingarnir fara at prýða við hvør síni kavaflykru ella glerpípu.

Í døgunum 1.– 15. des. skiftast flokkarnir um at heingja síni prýði á træið. Hetta fer fram í sambandi við morgunsangin, har næmingarnir eisini standa fyri morgunsanginum.

Í hesum sambandi bjóða vit foreldrunum at koma og vera við til morgunsangin.

Felagsforeldrafundur

Í kvøld, mikukvøldið 28. okt. kl. 19, skipar skúlastýrið fyri felagsforeldrafundi fyri foreldur at næmingum í Tofta skúla. Á fundinum fer Gitte Klein frá Skúlabókagrunninum at tosa um týdningin av lesing, møguleiki verður at seta spurningar og fáa kjak um evnið. Harumframt verður ársfrágreiðingin frá skúlastýrinum løgd fram.

Djúphugsnidagur

Týsdagin 27. okt. verður Djúphugsnidagur á skránni. Evni hesaferð er: Ferðsla, sum er eitt av teimum kravdu evnunum, ið skulu takast upp í fólkaskúlanum

Dagurin byrjar kl. 8.00, og endar kl. 13.30. Næmingarnir skulu hava pennalarhús við, tey fáa frukt og breyð í skúlanum.

Foreldur og onnur eru hjartaliga vælkomin framvið at síggja tað, sum gongur fyri seg.

Rørsludagur

Mikudagin 17. juni verður skipað fyri rørsludegi í Tofta skúla. Dagurin byrjar við morgunsangi kl. 8. Síðan verður felagsupphiting í høllini, og næmingarnir fáa at vita hvørjar bólkar, tey skulu í. Tá ið øll hava fingið hvør sítt súrepli, fara bólkarnir út í náttúruna kring bygdirnar, har tey skulu finna ymiskar postar.

Næmingarnir hava fingið bræv heim við, har heitt verður á teir um at vera væl ílatnar og hava matpakka og okkurt drekkandi við sær.

Rørsludagurin er liðugur kl. 13.

Minnisframsýning um Jessie Høgagarð

Leygardagin 6. og sunnudagin 7. juni verður skipað fyri eini minnisframsýning um Jessie Høgagarð. Framsýningin verður opin báðar dagarnar frá kl. 15 til 18.

Í hesum sambandi hevur verið heitt á tey, sum hava gingið til handarbeiði hjá Jessie, um at lata tvey av sínum handarbeiðum inn til framsýningina - tað kundi verið eitt eldri og eitt nýggjari handarbeiði.

Handarbeiði kann latast inn í Tofta skúla hósdagin 4. juni kl. 19 - 22 og fríggjadagin 5. juni kl. 9 - 12. Um tit vilja vita meira, kunnu tit ringja til Mariu Rasmussen tlf.447833.

Framsýningin umfatar eisini ymiskt kvøldskúlaarbeiði og næmingaarbeiði veturin 2008/09.

Skúlanæmingarnir skulu hava tveir lutir, sum tey hava gjørt í handarbeiði, smíð ella evning, við hósdagin 4. juni. Hesir lutirnir verða eisini við á minnisframsýningini.

Fyrireikarnir gleða seg til framsýningina, men vísa á, at hon bert kann gerast áhugaverd, um fólk vilja koma við tí, tey hava gjørt, og vísa tað fram.

Vitjan av Duo Stimmhorn

Fríggjadagin 15. mai høvdu vit vitjan av Duo Stimmhorn. Limirnir í Duo Stimmhorn eru Christian Zehnder og Balthasar Streiff, sum við alphorn og sangi/jodli framførdu tónleik, har tað forna og upprunaliga var blandað saman við nútíðartónleik á ein serligan hátt.

Teir syngja/jodla og nýta nógv ymsik ljóðføri, men tó serliga alphorn, ið serliga er kent í Sveisisku Alpunum. Tað er eitt træhorn, upprunaliga gjørt av grann, sum bognar av trýstinum frá kavanum, ímeðan tað veksur,. “Büchel” er ein minni útgáva av alphorni og ”Alpofon” er ein uppfinning hjá Balthasar Streiff.

Til yvirtónasang verður ein serligur teknikkur nýttur. Til ber at syngja upp til 14 yvirtónar frá einum einstøkum grundtóna. Tann, sum fær kontroll á hesum, ofta sera skjóttgangandi tónum, kann syngja í fleiri stemmum.

Bæði næmingar og lærarar eru samd um at hetta var eitt fantastiskt upplivilsi.

Sí myndir frá vitjanini

7. flokkur við í SEV-kapping

SEV skipar á hvørjum ári fyri ein skúlakappingin um orkunýtslu, sum allir 7. flokkarnir í landinum kunnu luttaka í. Høvuðsvinningurin í ár var ein ferð fyri allan flokkin til Reykjavíkar. Harumframt vórðu 4 aðrar virðislønir lætnar.

7. flokkur í Tofta skúla hevur í ár luttikið í kappingini, og tí var mikudagurin 1. apríl ein eitt sindur øðrvísi dagur hjá 7.flokki. Tey møttu kl 8 sum vanligt, men tað var ikki í skúlanum. Leiðin gekk til Havnar, har tey skuldu í Norðurlandahúsið at luttaka í avdúkingini av tí landsumfatandi skúlakappingini hjá SEV fyri 7. flokkar.

Kappingin var í tveimum pørtum. Fyrri parturin umfataði eina skrivliga uppgávu um vikuna í tær sjey vikurnar, kappingin vardi. Endamálið er at næmingarnir læra um elorku við grundarlagi í ársfrágreiðingini hjá SEV og brúka vitanina til at loysa uppgávurnar. Harumframt hava næmingarnir skrásett elorkunýtsluna í skúlanum og heima, og samstundis hava teir funnið sparimøguleikar bæði á skúlanum og heima.

Í seinna partinum av kappingini skuldu flokkarnir gera uppskot til lýsingar um elorkusparing, har málbólkurin var ungfólk í aldrinum 13-16 ár.

Hesar lýsingar vóru latnar inn tann 16.mars. Tann 1. apríl var dagurin, har allir 14 skúlaflokkarnir, ið vóru við í kappingini, skuldu leggja fram teirra avrik. Framløgurnar gingu væl, og næmingarnir hugnaðu sær rættuliga. Tann fyrsta framløgan var kl 10, og so var koyrt á til uml. Kl 14. Onkur støðgur var, so at næmingarnir kundu strekkja beinini, og á døgverða fingu tey pizza og sunkist.

Stuttligt var at síggja tær ymisku framløgurnar, og Hákun Djurhuus, stjóri í SEV, sum var ein av dómarunum, segði eftir kappingina, at hann og hini í dómsnevndini vóru ovfarin av mongu góðu uppskotunum, sum flokkarnir høvdu latið úr hondum. Úrslitið var, at 7. flokkur á Velbastað fekk flest stig bæði fyri skrivligar uppgávur og lýsingauppskot, og vunnu tey vikuskiftistúrir til Reykjavíkar, sum var høvuðsvinningurin í kappingini.

Vit fegnast um at hava verið við í kappingini. Og ynskja teimum 8 næmingunum á Velbastað til lukku við sigrinum.

Vitjan av Eysturoyar Dansifelag

Vit eru í hægstu dansitíð, og í tí sambandi vóru umboð fyri Eysturoyar Dansifelag í Tofta Skúla hósdagin 12. feb., har tey dansaðu og kvøddu saman við næmingum og lærarum. Hvør flokkur venur sítt kvæðið, sum tey so skipað á føstulávint, tá allur skúlin í felag fer upp á gólv.

Í ár er "Sigmunds kvæði yngra" felags kvæðið fyri allar flokkarnar, tí høvdu vit heitt á Jens Dalsgaard, lærara, um at siga næmingunum frá um søguna, ið hetta kvæði er yrkt um og røða um føroyska dansin.

Hósdagin møttu seks eldsálir frá Eysturoyar Dansifelag upp í Tofta Skúla. Tey komu úr Funningi, Syðrugøtu og Saltangará, av Norðskála.

Næmingarnir vóru skipaðir í bólkar. Fyrst greiddi Jens frá um "Sigmunds kvæði yngra", síðan varð farið upp á gólv. Teir ymisku flokkarnir skipaðu tey kvæði, tey læra í ár, og síðan var "Sigmunds kvæði yngra" á skránni. Tað riggaði stak væl saman við fólki, ið hevur skil fyri kvøðing og dansi. Næmingarnir kvóðu bæði hart og væl.

Sí myndir frá tá Eysturoyar Dansifelag vitjar

Djúphugsnidagur 3. feb.

Týsdagin 3. feb. verður Djúphugsnidagur á skránni. Lærugreinin vit hesaferð fordjúpa okkum í er: Føroyskt. Yvirskriftin fyri dagin er Føroysk mállæra og staving.

Dagurin byrjar kl. 8.00, og endar kl. 13.30. Næmingarnir skulu hava pennalarhús við, tey fáa frukt og breyð í skúlanum.

Foreldur og onnur eru hjartaliga vælkomin framvið at síggja tað, sum gongur fyri seg.

Vinnararnir av búmerkjakappingini avdúkaðir

Í sambandi við at skúlin hevur verið undir stórari um- og útbygging, varð skipað fyri búmerkjakapping millum borgararnar í Nes Kommunu.

Eini 90 myndir av ymiskum slag komu inn til búmerkja-kappingina. Ein dómsnevnd varð sett, sum nú hevur valt trý tey bestu búmerkini. Í treytunum til bumerkjakappingina, tilskilaði dómsnevndin sær rætt til, ikki at brúka nøkur av innkomnu uppskotunum til búmerki.

Við hjálp frá Oddbjørg Højgaard, grafiskum sniðgeva, varð búmerkið hjá Remi á For valt sum nummar eitt. Nummar tvey og trý gjørdust ávikavist Sofus Johannesen og Andri Gerðisá.

Vinnarin fekk ein iPod, nummar tvey eina fartelefon og nummar trý eitt gávukort.

Myndir frá avdúkingini

Vinnararnir av búmerkjakappingini funnir

Tað komu nógv uppskot inn til búmerkjakappingina hjá Tofta skúla. Ein dómsnevnd hevur nú avgjørt hvør fær 1., 2., og 3. virðisløn.

Í hesum sambandi verður skipað fyri samkomu í skúlanum mikudagin 10. des. kl. 10.30. Her verða virðislønirnar handaðar. Samstundis verður øll tey innkomnu uppskotini sýnd fram. Sum víst á í treytunum fyri Búmerkjakappingina, tilskilar skúlin sær rætt til at velja, um uppskotini verða nýtt ella ikki.

Foreldur og onnur bygdafólk eru vælkomin at verða við.

Foreldrini vælkomin til morgunsang

Mánadagin 1. des. prýddu næmingarnir skúlan við alskyns jólaprýði. Jólanevndin hevur í ár valt 6 sálmar út, sum næmingarnir skulu venja í desember mánaða, soleiðis at teir duga teir uttanat til jólaveitsluna.

Aftur í ár hava vit eitt felags jólatræ, sum næmingarnir fara at prýða við hvør sínum hjarta ella kramarhúsi.

Í døgunum 1.– 15. des. skiftast flokkarnir um at heingja síni prýði á træið. Hetta fer fram í sambandi við morgunsangin.

Í hesum sambandi bjóða vit foreldrunum at koma og vera við til morgunsangin. Skráin fyri hvussu vit pynta jólatræið

Skúlastýrisvalið 2008

Úrslitið av skúlastýrisvalinum 11. nov. 2008

Vald vóru

Annfríð Neslíð, Toftum

Karl Joensen, Saltnes

Justin Philbrow, Toftum

Tiltakslimir eru:

Heidi Vang, Toftum

Elsa Hansen, Toftum

Jóan Petur Frederiksberg, Nes

Skúlin alment tikin í nýtslu

Leygardagin 4. okt. er hátíðardagur í Nes Kommunu. Hendan dagin verður nýggi skúlin á Toftum alment tikin í nýtslu.

Hátíðarhaldið byrjar kl. 13. Á skránni verður felagssangur, røður, Musikskúlanæmingar spæla og Kirkjukórið í Fríðrikskirkjuni syngur.

Aftaná verður høvi hjá fólki at ganga runt og síggja skúlan, meðan tey njóta ein góðan bita og lurta eftir tónleiki og øðrum, sum næmingarnir framføra. Almenna hátíðarhaldið er liðugt kl.16.

Øll eru hjartaliga vælkomin at koma framvið. Vit vænta at síggja nógv fólk, bæði bygdafólk og avbygdafólk, hendan dagin.

Skráin fyri hátíðarhaldið

Undirvísing við mikrofon

Tofta skúli hevur síðan januar mánaða royndarkoyrt tvey ymisk tráleys ljóðanlegg inni í núverandi 3. og 6. flokki.

Hetta kom í lag, við tað at Jóhannes Steingrund (frá Steingrund Akustik Sp/f) hevur verið við í arbeiðinum at útbyggja Tofta skúla, fyri at fáa so góð ljóðviðurskifti sum gjørligt allastaðni í byggninginum.

Jóhannes ger vart við, at í londum kring okkum er kravt, at undirvísingarhøli eru útgjørd við ljóðanleggi.

Hann hevur gjørt eitt uppsøkjandi arbeiðið fyri at finna hóskandi ljóðanlegg og bjóða okkum at royndarkoyra tey.

Vit eru sera nøgd við tað eina anleggið. Hetta er hátalari, ið kann vera tráleysur, við innbygdum móttakara og forsterkara við sera góðum ljóði. Tvær mikrofonir hoyra til, ein vanlig, og ein at bera á høvdinum og fýra oyramikrofonir, alt er tráleyst.

Hendan útger vísir seg at hava nógvar fyrimunir í undirvísingarhøpi.

Øll hoyra tað, ið verður sagt
Meira ró er í hølinum, og gevur tað betri arbeiðsfrið
Skjótari er at koma í gongd, og harvið minni spilltíð
Undirvísarin ella næmingurin hevur ikki fyri neyðini at hevja røddina fyri at hoyrast
Næmingurin gerst vanur við at hoyrast, og at tað verður lurtað eftir tí, ið hann hevur at siga
Oyramikrofonirnar eru sera góð hjálp til tey, ið hava ilt við at konsentrera seg
Anleggið kann setast til telduna, so tað eisini er hátalaraanlegg til teldu og samvirknu talvuna
Tað fyllir rættiliga lítið
Tú kanst taka anleggið við tær í hondina, til undirvísing á øðrum stað úti ella inni

Lærarar, ið hava roynt útgerðina, vóna, at hon verður tøk í øllum undirvísingarhølum á skúlanum.

Sí myndir

Seinasti skúladagur hjá 10. flokki

Í morgun 4. juni hevði 10. flokkur seinasta skúladag. Næmigarnir høvdu verið á skúlanum alla náttina, men hóast lítlan ella ongan svøvn stóð eitt vældekkað borð fyri lærarunum, tá ið teir komu í skúla kl. 7.30

Aftaná morgunsangin fóru næmingar og lærarar niðan á Svangaskarð, har 10. flokkur skipaði fyri postarenning. Tá ið næmingarnir høvdu roynt allar postarnar, hevði 10. flokkur skipað so fyri, at øll fingu heitar pylsur, breyð og sunkist.

Tann árligi fótbóltsdysturin millum 10. floks næmingar og lærararnar var eisini á skránni. Í ár vunnu lærararnir 3 - 1.

Dagurin endaði við, at 10. flokkur kom berandi við einum stórum pappkassa. Næmingarnir settu seg spentir á áskoðaraplássini, klár at taka ímóti slikkipinnunum, sum skuldu vera í kassanum. Løtu seinni vísti tað seg, at kassin var fullur av vatnballónum, sum skjótt regnaðu omanyvir næmingarnar. Øll hugnaðu sær óført, og tað er ilt at siga, hvør var vátari 10. floksnæmingarnir ella hini.

Myndir frá seinasta skúladegi

Hugskotskapping

Í sambandi við at vit fáa nýggjan skúla til komandi skúlaár, skipa vit fyri einari hugskotskapping um at tekna nýtt búmerki til Tofta skúla.

Henda kapping er fyri næmingar, foreldur og lærarar í Tofta skúla. Tríggjar virðislønir verða lætnar. Les meira um kappingina og treytirnar fyri búmerki her.

Djúphugsnidagur 15. mai

Tann 15.mai fer Tofta skúli at hava sín seinna djúphugsnidag í hesum skúlaári. Lærugreinin, vit hesaferð fordjúpa okkum í, er Náttúra og tøkni. Yvirskriftin fyri dagin er Nærumhvørvið, og tí er eisini møguleiki fyri at gera brúk av lokalum kreftum. Evnini eru: sjógvurin, sjóvarmálin, fjøran, bygdin, hagin, vatnið, áin og orka.

Framhaldsdeildin verður ikki við hesaferð, tí tey eru til próvtøku. Næmingarnir verða skipaðir í bólkar, har hvør bólkur er samansettur av næmingum frá 1. til 7.flokk.

Dagurin byrjar kl. 8.00, og eru øll úti allan dagin til kl. 12.30, ella longur, um hugurin er til tað.

Fríggjadagin 16.mai kl. 9.45 verða so framløgur, har hvør bólkur greiðir frá, hvat tey hava fingið burturúr og lært um teirra evni. Umleið kl. 11.00 verður ein støðgur, har øll fáa mat frá skúlanum. Eftir støðgin verður hildið fram, til øll hava havt sína framløgu. Skráin fyri framløgurnar

Foreldur og onnur eru vælkomin at vera til staðar til framløgurnar.Brævið til foreldrini

8. flokkur komin heim úr Noreg

Tíðliga í morgun, mánamorgunin 14. apríl, komu næmingarnir í 8. flokki aftur av ferð í Noreg, har tey millum annað hava vitjað ein vinarflokk úr Kvalsvig.

Í Kvalsvig fingu tey høvi at heilsa uppá landsliðsspælaran Rógva Jacobsen.

Fyrilestur um fyribyrging av happing

Týskvøldið 8. apríl kl. 19 heldur Helle Høiby fyrilestur, um hvussu vit kunnu fyribyrgja happing. Fyrilesturin verður inni í ítróttarhøllini í Runavík. Helle Høiby arbeiðir sum konsulentur í fyribyrging av happing.

Hesin fyrilesturin er ein liður í okkara arbeiði ímóti happing. Í Tofta skúla arbeiða vit við at fyribyrgja happing eftir arbeiðshættunum hjá Helle Høiby, og í tí sambandi hevur hon verið her og havt skeið fyri lærarunum.

Møtið fjølment!

Vitjan frá Eysturoyar Dansifelag

Tofta skúli hevur í nógv ár gjørt nógv burturúr í sambandi við føstulávint. Vanligt er, at hvør flokkur lærir seg eitt kvæði ella ein tátt, sum tey so skipa á føstulávintshaldinum hjá skúlanum.

Mikudagin 23. januar høvdu vit vitjan av 4 limum úr Eysturoyar Dansifelag. Tey vóru runt í ymiskum flokkum og dansaðu og kvóðu saman við næmingunum. Hetta eydnaðist stak væl, og næmingarnir fingu nógv burturúr at møta fólki, sum brenna fyri tí føroyska dansinum.

Komandi mikudag 30. januar koma tey aftur, og tá fara tey at vitja teir flokkarnar sum, tey ikki náddu fyrru ferð.

Sí myndir frá vitjanini

Foreldrini vælkomin til morgunsang

Mánadagin 3. des. byrja jólafyrireikingarnar á skúlanum av álvara. Tá verður skúlin prýddur við alskyns jólaprýði. Í ár fara vit á øðrum sinni at hava eitt felags jólatræ, sum næmingarnir fara at prýða við hvør sínari stjørnu.

Í døgunum 3. – 7. des. skiftast flokkarnir um at heingja sínar stjørnur á træið. Hetta fer fram í sambandi við felagsmorgunsangin, sum byrjar aftur mánadagin. Morgunsangurin verður á aðru hædd í tí nýggja bygninginum, har sum 1. og 2. flokkur halda til.

Í hesum sambandi bjóða vit foreldrunum at koma og vera við til morgunsangin. Skrá fyri pyntidagin og hvussu vit pynta jólatræið

Sí myndir

Djúphugsnidagur

Fyrsti Djúphugsnidagur í Tofta skúla er júst liðugur. Evnið hesaferð var støddfrøði. Næmingarnir hava í dag arbeitt í verkstøðum, har uppgávurnar umfataðu ymiskar roknitættir, so sum talvenjing, mát, geometri.

Næmingarnir hava arbeitt í bólkum tvørturum flokkar, soleiðis at t.d. næmingar úr 5. flokki hava verið í bólki saman við næmingum úr 6. og 7. flokki. Hetta dámdi næmingunum sera væl.

Dagurin í dag var eisini øðrvísi á tann hátt, at næmingarnir nýttust ikki at hava matpakka við, tí skúlin syrgdi fyri, at øll fingu frukt og matpakka.

Dagurin endaði við, at allir næmingarnir savnaðust til eina løtu við felagssangi, áðrenn tey vælnøgd fóru hvør til sítt.

Sí myndir

Partur av nýggja skúlanum tikin í nýtslu

Mánadagin 22. okt. varð partur av nýggja skúlanum tikin í nýtslu. Í hesum sambandi savnaðust næmingar og lærarar til morgunsang í einari av teimum nýggju skúlastovunum. Har kunnaði Marita um tann nýggja partin av skúlanum, hon gleddist um, at vit nú eru komin so langt, og legði dent á, at vit øll mugu ganga væl um hølini.

Í ár húsast 3. - 5., 6. og 7. flokkur á tí ovastu hæddini. Næmingarnir vóru sera spentir at síggja sínar nýggju skúlastovur, og teir vórðu ikki skuffaðir. Stovurnar eru sera vakrar og við øllum nútímans hentleikum.

Næmingarnir gløddu við, tá ið vindeyguni brádliga fóru upp av sær sjálvum. Arkitektarnir hava lagt seg eftir, at bygningurin skal vera so orkusparandi sum gjørligt, tí er ein sjálvvirkandi skipan, sum stýrir ljósi, hita og inniluft.

Týsdagin 30. okt. flyta 1. og 2. flokkur inn á miðhæddina. Tá sleppa hinir flokkarnir, sum hava húsast ymsastaðni kring bygdina, eisini aftur í skúlan.

Sí myndir

Norðurlendskur skúlarenningardagur

Í oysandi regni og mjørka fóru næmingar og lærarar treystir av Svangaskarði, hjá summum var málið 11,2 km, nøkur ætlaðu at renna 6 km, meðan onnur høvdu sett sær enn størri mál.

Í dag, 12. okt., høvdu vit Norðurlendskan skúlarenningardag. 10. flokkur skipaði fyri degnum, sum byrjaði við upphiting á graslíkisvøllinum á Svangaskarði. Tá ið næmingarnir komu aftur, fingu teir góðgæti og diplom.

Hóast tað var heldur vátt, høvdu vit ein sera góða dag, og enn einaferð vístu næmingarnir, at teir helst eru millum teir raskastu í landinum.

Sí myndir frá Skúlarenningardegnum

Seinasti arbeiðsdagur hjá Harry og Linu

Í dag 1. okt. høvdu Lina Andersen og Harry Hansen sín seinasta arbeiðsdag í Tofta skúla. Lina og Harry hava starvast í Tofta skúla í 26 ár sum ávíkavist vaskikona og húsavørður. Í hesum sambandi skipaði skúlin fyri eini hugnaløtu úti í Missiónshúskjallaranum, har næmingar og lærarar fingu høvi at siga Harry og Linu farvæl.

Nakrir felagssangir vóru á skránni, og Marita helt røðu, har hon takkaði Harry og Linu fyri trúgva tænastu. Emma, kona Harry, sum saman við Harry hevur røkt svimjihylin, fekk eisini eina tøkk. Marita nevndi m.a., at bæði fólk, sum dagliga ferðast á skúlanum, og fólk, sum koma á gátt, hava á orði, hvussu reinur og snøggur skúlin er. Marita handaði Harry og Linu hvør sína gávu sum minni um tíðina, tey hava starvast í skúlanum.

Tann nýggi húsavørðurin eitur Borgar Hansen og er av Nesi. Símun Johannesen, borgarstjóri nýtti høvi at bjóða honum vælkomnum, og Harry handaði honum lyklarnar og telefonina.

Aftaná hugnaløtuna var okkurt gott til matna bæði fyri børn og vaksin.

Seinnapartin skipaði Nes Kommuna fyri móttøku fyri Emmu og Harry niðrí á Vesturskin.

Sí myndir frá Hugnaløtuni

Sí myndir frá Móttøkuni

4. a fangar krabbar í Æðuvík

Mikudagin 19.september vóru vit í 4.a í Æðuvík. Lis, Andrea og Sólvá vóru við okkum. Vit skuldu leita eftir krabbum, gággum, marflugum og annars taka øll livandi (og deyð) dýr heim við okkum. Tá ið vit komu heim aftur, skuldu vit í náttúru/tøkni stovuna at hyggja nærri at okkara fongi.

Veðrið var ordiliga lekkurt, og vit vóru heppin, tí tá vit fóru úr Æðuvík, fór at regna. Jan hevði skaffað okkum toskarhøvd av Nyki, so væl lá fyri at fáa krabbar. Eg haldi at vit fangaðu einar 14 krabbar tilsamans. Teir komu tó ikki inn í skúlastovuna, men fóru glaðir aftur á sjógv. Komin heim í skúlan, fingu vit okkum matpakka, og so inn í tíma aftur. Vit høvdu funnið eina rúgvu av djórum og plantum.

Vit vóru sera glað fyri túrin, og fara heilt vist onkran líknandi túr aftur. Um ikki til Æðuvíkar, so onkra aðra staðni á oynni.

Sí myndir

Fyrsti skúladagur hjá 1. flokki

Blitsini skygdu um alla skúlastovuna í dag, tá ið 18 spentir næmingar byrjaðu í 1. flokki. Atli Johansen er flokslærari hjá 1. flokki. Dagurin byrjaði við at Marita bjóðaði næmingunum at vera vælkomin í skúla. Síðan segði Atli teimum frá ymiskum, sum er vert at vita, tá ið man byrjar í skúlanum. Næmingarnir fingu gávur frá onkrum peningastovnum, sangur og dansispæl var eisini á skránni. Áðrenn tey fóru útaftur í illveðrið, varð fyrsta felagsmyndin tikin.
Sí myndir frá fyrsta skúladegi hjá 1. flokki

4. flokkur vitjar vinnulívið á Toftum
Mikudagin var 4. flokkur og vitjaði vinnulívið á Toftum. Vit byrjaðu hjá Føroya Fiskavirking á Toftum, har vit sóu hvussu saltfiskur verður tilvirkaður. Síðan fóru vit yvir á Fiskamarknaðin, har vit vóru við meðan telefonuppboðssølan fór fram og síðan vitjaðu vit S.D.Beding.
Sí myndir frá vitjanini

3. b á seturskúla
Í døgunum 14. - 15. juni var 3. b á seturskúla á Oyri. Har upplivdu tey mangt og hvat.
Sí myndir frá seturskúlanum


Seinasti skúladagur hjá 10. flokki
Í brennandi sól og blankastilli høvdu vit seinasta skúladag hjá 10. flokki mánadagin 4. juni. Hóast næmingarnir høvdu havt eina langa nátt við lítlum ella ongum svøvni, var alt til reiðar, tá ið næmingar og lærarar møttu. Morgunsangurin fór fram í í skúlagarðinum, og síðan varð gjørt klárt at fara niðan á Svangaskarð. Brádliga hoyrdust øgilig skríggj, og næmingarnir runnu í allar ættir, í meðan vatnballónirnar komu sendandi gjøgnum luftina. Á Svangaskarði skipaðu 10. flokkur fyri eini postarenning, har øll luttóku, og síðan var árligi dysturin millum 10. floks næmingar og lærararnar á skránni. Tað var sum at vera til landsdyst, rómurin var øgiligur, men hóast lærararnir bardust sum úlvur á skóg, endaði dysturin tó við, at 10. flokkur vann 5 - 2. Aftaná dystin fóru vit oman aftur í skúlagarðin, har vit fingu grillaðar pylsur og sunkist.
Sí Myndir frá seinasta skúladegi