14
lærarar úr Miðnámsskúlanum í Suðuroy fara restina av árinum at luttaka á skeiði,
sum skal menna teirra førleika til at nýta KT í frálæruni. Skeiðið byrjaði
týdagin 2/3-04 við einum innleiðsludegi. Á hesum degi fingu luttakararnir eina
kunning um konseptið og tað praktiska, mannagongdir o.a. varð eisini lagt til
rættis. Restin av samskiftinum millum vegleiðarar og skeiðsluttakarnar fer fram
gjøgnum elektroniska stevnuskipan.
Luttakararnir skulu seta seg inn í nógv tilfar, bæði námsfrøðiligar greinar og KT-handverk. Tey skulu í toymum lata 8 uppgávur inn, sum skulu verða góðkendar fyri at hava lokið útbúgvingina. Tann samlaða arbeiðsorkan, sum skal leggjast í frá tí einstaka, kann skifta frá persóni til persón. Luttakarar sum hava góðar fortreytir til KT-nýtslu kunnu skjótari fara ígjøgnum tilfarið. Tann yvirorðnaða tíðarætlanin er, at útbúgvingin verður liðug 1. desembur 2004.
Tað
eru ikki bert lærararnir í Suðuroy, sum taka hesa eftirútbúgving. Longu í august
2003 byrjaðu 17 lærarar á Handilsskúlanum í Tórshavn uppá somu útbúgving. Hesi
verða liðug áðrenn summarfrítíðina 2004.
KT-depilin, ið er útbjóðari av skeiðnum, hevur ábyrgdina av at knýta vegleiðarar at skeiðnum og av tí umsitingarliga partinum.