Yrkingakapping 2005

Mánadagin 21. nov. vóru virðislønirnar í yrkingakapping KT-depilsins latnar í Mentamálaráðnum.

Fitt av fólki var komið saman til at vera við, tá ið virðislønirnar í yrkingakappingini vóru handaðar. Umframt teir seks vinnararnar vóru foreldur, systkin, floksfelagar, lærarar og onnur avvarandi komin fyri at vera við til hátíðarhaldið.

Endamálið við yrkingakappingini var at styrkja kunningartøknini í undirvísingini og styrkja førleikan hjá næmingum at nýta samskiftisskipanina hjá skúlanum.

Kappingin byrjaði eftir summarfrítíðina 1. septembur og endaði til heystfrítíðina 7. oktobur. Kappingin var skipað á tann hátt at næmingar í fólkaskúlanum kundu senda yrkingar til eina stevnu, sum sjálvvirkin sendi tær víðari til ein umsitara. Umsitarin tók so navn og bústað sendarans burtur og lat síðan yrkingarnar víðari til dómararnar. Tað vóru tveir dómarar, báðir útbúnir lærarar við royndum. Annar yrkjari og hin ráðgevi í føroyskum í LMS.
Kappingin var flokkað í tríggjar aldursbólkar. Luttøkan var sera góð í teimum eldru bólkunum, men í yngsta bólkinum komu bara fáa yrkingar inn.

Handanin byrjaði við, at Regin Ellingsgaard, stjóri í KT-deplinum beyð fólki at verða vælkomin og segði nøkur orð um ætlanir um kt í undirvísingini. Sigurlaug Nielsen, sum er orðstýrari í undirvísingarstevnunum, greiddi fólki frá, hvussu kappingin var skipað.
Dómararnir, Evald Rasmussen og Oddfríðaur Marni Rasmussen lósu vinnandi yrkingarnar upp og handaðu vinnarunum virðislønirnar.

Vinnararnir vóru hesir:

5-7 flokkur:
1. virðisløn - Jenny J. Kragesten, 6.a í Eysturskúlanum, fyri yrkingina Flaggið
2. virðisløn - Andrias Eriksen, 7.a í Vestmanna skúla, fyri yrkingina Fjallið
3. virðisløn - Rúnar Silvurstein, 5. fl., í Hest skúla, fyri yrkingina Ýlandi vindar

8-10 flokkur:
1. virðisløn - Solveig Hansen, 9.c í Tórshavnar Kommunuskúla, fyri yrkingina Rísan - Fallan
2. virðisløn - Heidi Joensen, 10.a í Vestmanna skúla, fyri yrkingina Ótti
3. virðisløn - Marna Joensen, 10. a í Vestmanna skúla, fyri yrkingina Burturmista tíðin

Vinnararnir

YRKINGAR 5-7. flokkur

Flaggið

Tað reyða er, sum tað ónda eygað
tað bláa, er sum tað, vit skoða
tað hvíta, er tað, sum vit nýta.

Jenný J. Kragesten
Eysturskúlin, 6.a (1. virðisløn)

Fjallið

Lokkandi og dragandi, 
dagar uppundan, 
eins og svørð, 
um bara eg kundi verið har nú.

Andrias Eriksen
Vestmanna skúli, 7. flokkur (2. virðisløn)

Ýlandi vindur

Ýlandi vindur brakandi hús
aldur á sjónum og eingin kiosk 
einki at keypa einki at fáa 
og her siti eg við tí seinasta bomminum.

Til Pipar & salt eg fari í kvøld 
at flenna, flenna og flenna. 
Men Vups, nú siti eg í skúla í Hesti!

Rúnar Silvurstein
Hest skúli, 5. flokkur (3. virðisløn)

YRKINGAR 8-10. flokkur

Rísan – Fallan.

Niður, niður, niður fert tú, og tú rakar botnin.
Leita tær vegin út, hvar skalt tú fara nú?
Hygg upp, hvat sært tú?
Myrkrið skal ei taka teg ...

Grát, grát, grát barnið mítt, lat alt fara, tína pínu.
Fløðandi úr eygum tínum, og grátandi ljóðini.
Nær fær hetta ein enda, er tað nú, tú skalt renna?
Pínan, longsulin, læt alt í mín favn...

Tómt, tómt, tómt, heimur tín er druknaður.
Spakuliga, stillisliga, tað krýpur, samlast á einum oydnum staði.
Finnur tað veg?
Goym teg, leita tær lívd, bangna barnið mítt ...

Solveig Hansen
Tórshavnar Kommunuskúli, 9.c  (1. virðisløn)

Ótti

Sólstrálur glitra á himli,
sum gullið glitrar í vatni
jørðin er mín móðir,
ið hevur lív í mær,
men kann nakar
taka tað frá mær?

Sólstrálurnar hvørva frá himli, 
sum dálkingin skuggar havbotnin
jørðin gert køld og myrk,
stjørnurnar glitra á himli so brátt
 og tankarnir byrja at sveima,
so óttin aftur tekur yvir.

Hin óveruliga ondin vitjar, 
vil tað sama sum altíð 
ongin nátt uttan vin mín,
ikki síðan tað hendi 
øll hata meg, sigur hann,
komi eg nakrantíð at sleppa undan honum?

Heidi Joensen
Vestmanna skúli, 10. flokkur (2. virðisløn)

Tann burturmista tíðin

Í myrkri liggur tíðin, tann burturmista tíðin.
Feiðað í eitt horn, har hon aldrin fær sín rætt,
ein tíð, ið aldrin kom, men heldur aldrin fór,
eitt minni, ið veikliga brennur, men aldrin sløknar heilt.

Eitt spæl aldrin spælt, tí tað ongantíð var lært.
Ein vøgguvísa aldrin sungin, tí har aldrin var eitt lag,
ein málningur ongantíð málaður, tí har aldrin var ein at mála.

Gólvið er slitið, tapetið er gulnað
leikurnar mistar burtur, burtur í einki.

Í myrkri liggur tíðin, tann burturmista tíðin.

Marna Joensen
Vestmanna skúli, 10. flokkur (3. virðisløn)