Øll, sum vara av skúlanum, eiga í felag at virka fyri einum happingarfríum skúla. Tað er ein mannarættur at fáa frið og at sleppa at vera tann, tú ert. Tað er eisini ein mannarættur at vera partur av einum størri felagsskapi, bæði fyri at menna teg sjálvan og eisini felagsskapin.

TEY, SUM VARA AV OKKARA SKÚLA

HVÍ VILJA VIT EIN HAPPINGARFRÍAN SKÚLA?

Bert á einum happingarfríum skúla ber til at trívast!

Bert tá vit trívast, læra vit!

Og tá vit trívast, er tað gott at vera til!

HVAT ER HAPPING?

Happing er, tá ein persónur ferð eftir ferð í eina ávísa tíð
á onkran hátt er fyri ágangi frá einum ella fleiri øðrum.

Persónarnir eru ikki líka sterkir.

Tann, sum líður undir hesum ágangi, hevur ilt við at verja seg
og er hjálparleysur mótvegis teimum, sum fremja ágangin.

HVUSSU FYRIBYRGJA VIT HAPPING?

Foreldur og lærarar hava ein týðandi leiklut til tess at fyribyrgja happing. Tey hava ábyrgd av at tosa við børnini um gongdina í skúlanum og trivnaðin hjá hvørjum einstøkum barni sær.

Samskifti og álit eru lívsneyðug, skal hetta eydnast. Tað er umráðandi, at allir avvarandi partar virka saman, tí einstaka barninum og harvið øllum skúlanum –
og sjálvum samfelagnum – at frama.