|
Skúlin varð vígdur 2. september 1956.
Kommunuskúlin var tann fyrsti av teimum stóru skúlunum, sum bygdir vóru í Føroyum.
Hann er ein av kendastu bygningunum í Havnini. Heilt serlig eru listaverkini í
skúlahøllini og eystanfyri á skúlanum. Í skúlaskálanum er evnið
Sjúrðarkvæðini. Stóri málningurin er av Sjúrði í bardaga við ormin, og á
bróstunum hanga myndir úr sama kvæði. Málað hevur William Heinesen. Skálin verður
m.a. nógv nýttur av kórunum í býnum.
Á skúlanum eystanfyri er stór høggmynd
av gomlum manni, sum situr undir børnum og sigur frá. Myndin bindur saman ættarliðini,
arvurin verður borin longri fram. Janus Kamban hevur høgt myndina, sum man vera ein tann
størsta í Føroyum.
Til vígsluna yrkti Heðin Brú kantatuna
Fedranna tala.
Sethúsini út ímóti Tróndargøtu verða
nýtt til fundarhøli, lærararúm, lesiskeið, serundirvísing og námsfrøðiligan
verkstað.
Skúlin í Kongagøtu stóð klárur at flyta
inn í mai 2005. Har húsast innskúlingin,
1., 2. og 3. flokkur, tvs. 6 flokkar. Skúlin er væl útgjørdur við
hentleikum, so sum teldum, sjónvørpum, tráðleysum netsambandi o.ø. Ljós- og
ljóðviðurskiftini eru sera góð. Málningalistina í Skúlanum í Kongagøtu hava
kend listafólk gjørt, m.o. Eyðun av Reyni, Eli Smith, Torbjørn Olsen og
Astri Luihn.
Í løtuni verður Realskúlin umvældur og umbygdur, har hava vanliga 4., 5. og
6. flokkur sínar heimastovur.
|
