Jólabræv 2010

Jólabræv

Seinnu árini hevur Kommunuskúlin við kunningarskrivum sum hesum greitt børnum, foreldrum og avvarðandi frá tí, sum fyriferst í skúlanum. Tað er okkara fatan, at hesi brøv hava verið væl móttikin, og hava vit tí gjørt av at halda fram við hesum kunningarhátti.
Hetta skriv, tú nú situr við, fáa næmingar skúlans handað um mánaðarskiftið november-desember, og er tað okkara vón, at tú her fært eina fatan av ymsu viðurskiftunum í skúlanum.

Ein minni skúli – ein spennandi skúli

Tað er eingin loyna, at Kommunuskúlin er minkaður í ár. Tvær høvuðsorsøkir eru til tess. Vit hava ikki 10. flokk longur; og skúlabyggingin í Havnini – tað veri seg uppi í Hoyvíkini og úti á Argjum – tekur av trýstinum á gomlu skúlarnar. Men eisini minkandi barnatalið í Føroyum ger sítt.
Vit hava í Kommunuskúlanum í hesum skúlaárinum fleiri spennandi námsfrøðiligar og fakligar verkætlanir í gongd.
Umfram tað spennandi samstarvið, sum er millum Kommunuskúlan og Musikkskúlan í sambandi við verkætlanirnar ”Litir í Leiki” og ”Samtón” og breiða og góða breytasamstarvið millum okkum og Eysturskúlan í sambandi við ”Nám X” verkætlanina, so fegnast vit eisini um at kunna greiða frá øktum samstarvi millum a- og b- toymini í fjórðu, fimtu og sættu flokkunum í sjálvstýrandi toymum og um teir í høvuðslærugreinunum samanløgdu 8ndu flokkarnar og ta sera spennandi nýskapina í føroyskum skúlaskapi: 9nda ð!
So tað er við røttum ryggi og bjørtum sinni, at vit í Kommunuskúlanum líta inn í framtíðina.

Ein musiskur skúli

Litir í Leiki heldur fram og mennist víðari. Nú eru tveir flokkar, sum verða undirvístir eftir hesum námsfrøðiliga leisti. Í tí sambandinum høvdu vit vitjan úr Finlandi fyri nøkrum vikum síðani av Varis Keikki. Og í hesum døgum hava brøðurnir Géza og Scaba Szilvay úr Helsinki skeið við øllum LíL - lærarunum og næmingunum her í Kommunuskúlanum.
Í 1.a eru vit farin undir spennandi royndarundirvísing í myndlist, sum m.a. merkir, at tey hava 2 tímar meiri undirvísing um vikuna. Meira verður at frætta um hesa spennandi listaverkætlan seinni.

SAMTÓN í 4. flokkunum ein blásiljóðførislæruskipan

Seinastu árini hava allir 4. flokkarnir í Kommunuskúlanum verið við í eini tónleikaverkætlan, har allir næmingarnir spæla hvør sítt blásiljóðføri. Orkestrið í 4. flokki í ár telur 37 tónleikarar. Fyrsta almenna framførsla teirra verður 15. des. kl. 19.
SAMTÓN-skipanin er tilevnað í Svøríki og roynd har við góðum úrsliti. Aðalmálið er orkesturspæl frá byrjan.
Skipanin er løgd soleiðis til rættis, at øll løgini í bólkunum veruliga kunnu nýtast, og at nótarnir eru væl hóskandi einstøku ljóðførunum. Endamálið er at fáa fleiri at spæla orkesturljóðføri og at skapa betri trivnað næminga millum.
Skipanin byggir á samanspæl frá byrjan við lítlum spæliførleika.
Orkestrið kann vera ein skúlaflokkur ella skúlaorkestur við 20-40 næmingum. Minst 3 lærarar umboðandi hvør sín ljóðførisbólk og floks- ella sanglærarin mugu vera við. Spælt verður 1 tíma um vikuna, bæði í orkestri og í ljóðførisbólki.
Næmingarnir royna tey ymisku ljóðførini fyrstu tíðina, síðan velja teir ljóðføri (ynski 1.,2.,3.). Lærararnir avgera, hvør spælir hvat, alt eftir førleika næmingsins og tørvi. Í royndartíðini meta lærararnir, hvat ljóðføri passar hvørjum einstøkum best.
Tað eru SAMTÓN-bøkur nr. 1,2,3,4, og 5, og næmingarnir hava ikki aðrar lærubøkur aftrat.
Ljóðførini eru hesi: floytur, klarinettir, trompetir, horn, trombonir, eufonium/bariton, bass, trummur.
VÆLKOMIN til framførsluna!

Samanlagdir flokkar... námsfrøðilig nýhugsan!

8ndi á

Teir báðir samanløgdu 8ndu (A+B) flokkarnir eru saman í Føroyskum, Donskum, Enskum og Støddfrøði
Í læraratoyminum eru: Karin Lange; Hjørdis Thomsen & Bergur Rasmussen

9ndi ð

9ndu flokkarnir báðir (C+D)eru skipaðir fullkomiliga av nýggjum. Her eru allir næmingarnir savnaðir í eina heild, sum arbeiðir eftir eini tímatalvu, ið skiftir alt eftir tørvi og náms- frøðiligum háttalagi.
Í læraratoyminum eru: Regin Marnersson; Margreth Veihe & Petur Reinert

Mannarættindi - rættindi og skyldur

•Toymini definera sjálvi tað konkreta evnið, ið flokkurin/-arnir arbeiða við. Men støði skal takast í gerandisdegnum hjá næmingunum. Tað er av stórum týdningi samstundis, sum talað verður um rættindi, at nevna orðið skyldur, sum eisini hoyrir við til eitthvørt fyribrigdi í samfelagi og samhaldi.

•Vit arbeiða við tí, ið t.d. hendir inni í skúlastovuni millum næmingar og millum næmingar og lærarar. Taka støði í umhvørvinum, sum næmingarnir ferðast í dagliga. Hetta fokus meta vit vera týdningarmikið, um børnini og tey ungu skulu kunna seta seg inn í, hvat hendir úti í stóru verð, har grundleggjandi mannarættindini verða tikin frá fólki og eisini brutalt verða brotin. Við egnum royndum og tilvitsku um okkara tørv á virðing, tryggleika, felagsskapi o.ø., gerast hugtøkini mannarættindi og mannarættindabrot viðkomandi og ikki bara nakað óítøkiligt, sum hendir í øðrum pørtum av heiminum, langt frá okkum.

•Hvørji rættindi hava vit í veruleikanum og hví hava hesi týdning ? Hvussu er við teimum grundleggjandi mannarættindunum hjá okkum?

•Tað hevur týdning at næmingarnir:
ikki einans læra um virðing, men eisini uppliva virðing í flokkinum
ikki einans læra um ábyrgd, men eisini kenna veruliga ábyrgd í skúladegnum
ikki einans læra um tolsemi, men eisini á egnum kroppi kenna, at ymiskleiki verður góðtikin.

Mest til foreldrini

•Foreldrafundir

•Tað hevur í fleiri ár verið skúlans politikkur, at felags foreldrafundurin, ið allir flokkar skulu hava, helst verður fyriskipaður áðrenn heystfrítíðin byrjar. Á hesum fundi verður kunnað um leiðreglur skúlans á ymsum økjum, og harumframt fáa lærararnir høvið at heilsa upp á foreldrini og greiða frá sínum námsfrøðisligu og fakligu ætlanum fyri verandi skúlaár.

Floksheimasíður
•

Allir flokkarnir í Kommunuskúlanum hava sína egnu floksheimasíðu undir heimasíðu skúlans (www.kommunuskulin.fo), og tó at tað er ymiskt, hvussu nógv verður gjørt burturúr hjá ymsu læraratoymunum, so stendur fast, at á øllum flokssíðunum er ein vikuætlan, har skúlatingini, sum børnini hava, í størst møguligan mun verða skrivaði inn. Síðan er eisini ætlað til onnur uppsløg av felags áhuga hjá børnunum og foreldrunum.

FirstClass skipanin

Øll, sum eru knýtt at skúlaverkinum – so ella so – í Føroyum, eru við í FirstClass skipanini. Hetta er altso landsins størsti elektroniski postkassi. Tað eru fleiri av flokkunum á skúlanum, ið brúka FirstClass sum miðil, tá ið boð skulu sendast næmingunum av ymsum slag. Skipanin verður eisini brúkt av summum flokkum, tá ið næmingarnir skulu lata inn skrivlig avrik, so sum stílar og líknandi.

Vitanet – elektronisk protokollføring

•Í fjør royndarkoyrdu vit á Kommunuskúlanum eina nýggja elektroniska protokoll-skipan, sum skuldi gera tað lættari hjá foreldrum at fylgja við uppmøtingini hjá børnum sínum. Royndarárið varð mett at hepnast so mikið væl, at hildið verður fram við skipanini aftur í ár

Evnisvika

Eftir heystfrítíðina var evnisvika hjá teimum yngstu næmingunum, 1. – 7. flokki. Vanliga tímatalvan varð niðurløgd og arbeitt varð í dýpdini við einum størri evni, ið hesa ferð hevði heitið Amnesty – mannarættindi.

Verkætlanarskeið

Aftaná heystfrítíðina hava 8ndu flokkarnir verið á skeiði í verkætlanararbeiði. Umframt at fáa kunning um hvussu arbeitt verður við verkætlanum, fáa næmingarnir eina ferð enn høvi at royna seg í hesum arbeiðshátti.

Starvsvenjing

Ungdómarnir í 9ndu flokkum okkara vóru burturi úr vanligari undirvísing tær tvær fyrstu vikurnar eftir heystfrítíðina, tí teir vóru í starvsvenjing tá. Vit skulu gera vart við, at í sambandi við starvsvenjingina skulu ungdómarnir skriva dagbók um tíðina.

Savnsfagnaðurin

18. til 23. oktober var árligi Savnsfagnaðurin fyri skúlanæmingunum. Søvnini lótu eisini hurðarnar upp á víðan vegg fyri almenninginum í heystfrítíðini. Savnsfagnaðurin varð væl vitjaður av næmingum okkara.

Síðan á skák

Spøkir tað her?
”Aaaarrrr!” nístini vóru øðilig.
Tað vóru genturnar í fimta, sum komu rennandi eftir gongini.
”Tað spøkir! Tað spøkir!” róptu tær.
”Tað er Johanna í hinum fimta!” segði Magdalena.
”Hon sigur, at tað er frøkun Cohr, sum Spøkir,” segði Rosalynn.
”Ja, og hon gongur í sovarnum klæðum, man gekk í fyri 100 árum síðani,” segði Anna Katrin, ið altíð er so mótabevíst.
”Og so kemur hon fram og rópar bøø!” segðiMagdalena.
Og so fóru øll børnini á gongini at brøla, og skríggja, og ýla, og geyla, og nísta, og hvína, og alt møguligt annað.
Uhadda dah, tann larmur, ið varð.
Ein lærari kom rennandi: ”Hvat ólukkan hendir her?”
Hon var pøst av at hava runnið upp gjøgnum allar samlar trappurnar.
”Tað spøkir!” róptu øll.
”Hvat siga tit?”
”Tað er Johanna í hinum fimta!” segði Magdalena.
”Hon sigur, at tað er frøkun Cohr, sum spøkir,” segði Rosalynn.
”Ja, og hon gongur í sovarnum klæðum, man gekk í fyri 100 árum síðani,” segði Anna Katrin, ið altíð er so mótabevíst.
”Og so kemur hon …”
”Altso, gentur,” breyt lærarin genturnar av.
”Nú roksa tit. Sjálvandi spøkir tað ikki her. Tað er bara nakað handan
Johanna hevur funnið uppá fyri at fáa uppmerksomheit.”
”Jamen, tað gongur eingin Johanna í hinum fimta flokkinum, tað er hon, sum spøkir!” róptu genturnar.
br

Framhaldssøga

Síðan á skák … annars …

Tað finnast bert trý sløg av fólki: Tey, sum duga at rokna, og tey, sum ikki duga at rokna!

-o-

- Hvat er helvtin av 8? spurdi lærarin.
- Niðureftir ella yvireftir? svaraði Birgir.
-
Hvat meinar tú við? spurdi lærarin.
-
Altso, koyrir man 8 í helvt niðureftir, so er tað 3, koyrir man tað í helvt yvireftir, so er tað 0!

-o-

-7 + 5 er tað elliviii, ella ellivuuu?

-o-

Hvat fært tú, um tú kryssar eina vampýr og ein lærara?
- Eina rúgvu av blóðroyndum!

-o-

Flokkurin hevði djóradag og mamman skeldaði Marionnu:
- Nei, tú sleppur ikki at hava lítlabeiggja við, sjálvt um tú heldur hann etur, sum eitt svín!