Ætlan fyri næmingar við atferðartrupulleikum

Børn við atferðartrupulleikum eru sosialt og kensluliga illa fyri, tey hava trupulleikar at samskipa uppfatan, motorikk og kenslur. Hetta ger, at tey hava vánalig samstarvsevni, og tey sosialu krøvini verða ov trupul.

Eyðkennir:

• Duga illa at lurta
• Fáa brádlig innskot (impulsiv)
• Duga illa at laga seg eftir virknisstøði
• Duga illa at skilja og fylgja boðum og reglum

Vit vilja:

Finna loysnir og mannagongdir so at hesir næmingar framhaldandi kunnu verða saman við sínum floksfeløgum í størst møguligan mun. Hetta fyri at kunna fáa eina so vanliga skúlagongd sum møguligt.

Hvør er mannagongdin:

Lærararin: finnur/sær/hevur trupulleikan.

Toymið: Viðgerð trupulleikan  og finnur út av/ger eina ætlan um,  hvat gerast skal.

Leiðsla: Toymið upplýsir leiðsluna um niðurstøðuna, leiðslan góðkennir.

Foreldur: Verða kunnað um trupulleikan og víðari mannagongd,  og avtala verður gjørd um samstarv.

Serlærari/Sernámsdepilin: Verður kunnaður um trupulleikan, ger møguligar kanningar, og hjálpir til at finna loysnir.

Heilsusysturin: Kannar næmingin um hildið verður, at tað er neyðugt, og kunnar.

Lækni: Ger sínar metingar, kunnar.

Møgulig fyribyrgjandi tiltøk:

Trygg viðurskifti eru týdningarmikil, og tí er umráðandi, at so fáar lærarar, sum gjørligt, eru um flokkin.

Skúladagurin má vera væl skipaður. Alt skal verða lagt í fasta ætlan frammanundan, og helst lítil ella eingin broyting í skúladegnum.

Um neyðugt verða eyka garðvaktir settar, so betur kann fylgjast við ávísum næmingum.

Neyðugt er at eftirmeta gongdina við jøvnum millumbilum.

Stig fyri Stig (Trin for Trin) www.cesel.dk : 1-4 fl. Lærir børn empati, sosialan atburð og at taka ábyrgd fyri egnum gerðum.

Lions Quest: 6-8 fl. Lærir børnini sosialan atburð.

Menningarætlan1, Mentamálaráðið, 2003.