Hugsa tær, at eina ferð vóru ongir fuglar
til! Teir fyrstu fuglarnir eru ikki íkomnir,
fyrr enn lívið á jørðini hevði tikið veruligt
dik á seg.

Øll vita, hvat ein fuglur er – ella hvussu?
Kanska er ikki so lætt at lýsa hugtakið
fuglur fyri tí, ið ongantíð hevur sæð
ein fugl!

Náttúran er margháttilig. Hugsa um tað!
Mest sum alla staðni eru fuglar.
Onkustaðni er nógv til av einum fugli, og aðrastaðni seta onnur fuglasløg sín
serliga dám á.

Sum annað kykt, eiga fuglarnir sína
sermerktu lívsleið. Teir ota seg fram úr
egginum, vaksa, koma fyri seg, fáa
ungar og doyggja.

Fuglar hava ymiskan lívshátt. Summir liva
fleiri saman, aðrir einsamallir, summir veiða
djór, aðrir tína fræ, summir flúgva langt av
leið, aðrir støðast í einum stað. Vit kunnu
halda fram við at greiða frá og vísa, hvussu ymiskir teir eru.

Tað er stuttligt at geva fugli gætur. Nógv
fólk eygleiða fuglar í frítíðini. Tú fært nógv
at vita, tá ið tú hyggur eftir fugli.