Myndin omanfyri vísir íslendskan teista. Føroysku teistarnir hoyra til eitt annað undirslag og hava ikki ta svørtu rípuna í tí hvíta á veingjunum.

Teistin er einasta svartfuglaslagið, ið er svart undir búkinum. Teistaveingirnir eru rættiliga kubbutir, og hann flýgur vanliga lágt yvir sjónum við títtum flogi. Tá ið hann flýgur á henda hátt, eru teir ljósu teinarnir á veingjunum sera ásýniligir.
Teistin ber seg nakað sum lomvigin, men fer tó meiri um uppi á turrum.
Teistin sæst mangan einsamallur ella í smáum flokkum.

Føði: krabbadýr og fiskur, serliga tarabrosma og nebbasíld.