Takkarøða
hildin 09-04-2005 í Miðhøll skúlans
Fráferð
Hans Erlands
Eg
fari í hesum sambandi at nýta høvi til at siga nøkur fá orð.
Hans
Erland hevur valt at fara frá , nú hann
er farin um tey 64 árini. Í 1964 tók hann læraraprógv og gjørdist lærari
á Eiði sama árið. Har starvaðist hann til 1974 við undantak av einum ári,
tá ið hann var lærari í Venjingarskúlanum. Sjálvur tók eg prógv í 1967
og gjørdist eisini lærari á Eiði.
Soleiðis komu okkara leiðir at fylgjast - fyrst á Læraraskúlanum, har vit
ikki kendu hvønn annan, og síðan í Eiðis skúla. Eg gekk í 1. flokki í Læraraskúlanum,
tá ið Hans Erland gekk seinasta árið í 4. flokki. Tá var einki samband
millum tey smáu í 1.flokki og tey stóru í 4.flokki. Men kortini er okkurt frá
teirri tíðini, ið bitið seg hevur fast í minnið. Eg haldi, at tað var
eitt uppslag at fáa fólk at syngja í kóri, har Hans Erland stóð aftanfyri
- hann skuldi leiða kórið. Í øllum førum var hansara navn nevnt. Og sum
vit vita, hevur hann gjørt nógv við kórsang síðan tá.
Í
mínum setanarbrævið frá1967 stóð, at eg skuldi tola at verða fluttur suður
í ein møguligan Felagsskúla í Sundalagnum. So longu tá hava ætlanir verið
um henda skúlan.
Skúlavirksemið
byrjaði her í 1971 við ongum bygningi og ongum lærarum. Húsast varð í
eini læntari skúlastovu í Norðskála-Oyrar skúla og læntum lærarum í økinum
her. Hans Erland var ein av teimum læntu lærarunum. Tá læt at kalla alt seg
gera - koyrt var ímillum skúlarnar í fríkorterinum.
1.jan.
1974 gjørdist Hans Erland skúlastjóri
í Felagsskúlanum á Oyrarbakka, tá stóð bygningurin í gerð - hann
var liðugur 1. apríl sama árið.
Fyrstu
lærararnir vóru settir 1.aug.1974, og sjálvur var eg ein teirra. Tað kundi
kanska sæð soleiðis út, sum um eg elti Hans Erland. Men vit mugu minnast
til, at her var so nógv, sum dró, nýggjar avbjóðingar við nýggjum skúla
og nýggjum ungum lærarum. Og eg má ásanna, at hetta hava verið nøkur frálík
ár við einum góðum skipara. Felags fyri flestu okkara tá og eisini skiparan
var, at vit vóru ógift. Hetta helt sær í nøkur ár, men so fór at dragna ,
ein fyri og annar eftir giftist - Hans Erland helt tørn leingi - men onkur helt
tørn longur.
Hans
Erland hevur teir eginleikar, sum eyðkenna ein góðan skipara: evnagóður, nærlagdur,
stundisligur, djarvur og hjartagóður. Hann er ein maður við myndugleika.
Dugir væl at leggja til rættis, fittur í hondunum. Tí sum kemur frá hansara
hond, har hanga leparnir ikki við. Hann er fornur, dugir væl at goyma og er góður
at heita á og góður í ráðum. Sjálvur hevur hann onkuntíð nevnt, at hann
er ov pertentligur. Tað haldi eg ikki. Hann er vælgerin, og tað hevur gagnað
skúlanum. Hann hevur dugað væl við næmingunum , hann hevur verið góður
við teir, og teir við hann. Tað gav at býta, tá ið ein av næmingunum helt
røðu í sambandi við, at Hans Erland fer. Hann segði millum annað gott, at
Hans Erland hevði verið ein tryggleiki á skúlanum.
Sama
sigi eg, og eg haldi, at eg havi hinar lærararnar við mær. Tú hevur verið
ein fyrimynd fyri okkum øll, og eitt gott umboð fyri skúlan.
Hesi
40 árini, ið tú hevur verið í skúlaverkinum, er nógv broytt. At fylgja við
hesum broytingum hevur tú dugað væl. Tær hava kravt nógv av lærarum og
ikki minst av leiðarunum. Eg skilji væl teir
lærarar, ið halda hetta seinasta nýggja við ársverki og virksemisætlanum
vera tyngjandi. Tað at vera skúlastjóri er í sjálvum sær eitt
krevjandi starv, og hetta seinasta nýggja hevur økt munandi um byrðina.
Hóast
vit lærarar, ið eftir eru, harmast um at missa teg, so unna vit tær væl eitt
lættari lív við minni ábyrgd. At lyfta byrðina eftir teg verður ikki lætt,
sjálvt um sagt verður, at maður kemur í mans stað. Vit vóna sjálvandi tað
besta fyri skúlan og ynskja eftir, at nýggi stjórin kann lyfta arvin eftir
teg.
At
enda fari eg at takka tær fyri alla tíðina, vit hava verið saman - fyri gott
samstarv. Um ikki altíð heilt samdir, so hava vit altíð drigið somu lína.
Tú
kanst fara frá við upplyftum høvdi - eftir teg er ein vælrikin skúli. Sjálvur
ert tú væl fyri, hví ikki vitja aftur her, um ikki annað sum avloysari?
Vegna
lærararnar fari eg at takka tær fyri tíðina og fyri gott samstarv. Og vit lærarar
vilja fegnir nýta hetta høvið at handa tær eina gávu, sum tú verður biðin
um at koma upp her at taka ímóti.